No outono teremos un xogo inspirado no efecto Tetris

Enhance Games, o equipo detrás de títulos como Rez Infinite e Lumines¸ está a traballar nunha nova produción que vai revolucionar un clásico dos videoxogos, Tetris Effect, que curiosamente inspírase no curioso efecto que padecen algunhas persoas que xogan moito a creación de Alekéi Pázhitnov (chegando a ver imaxes do xogo na vida real).
O novo xogo, que chegará a PlayStation 4 no outono ofrecendo tamén a posibilidade de gozalo tridimensionalmente se temos PlayStation VR, quere amplificar o efecto Tetris, de xeito que cada unha das súas 30 fases somerxeran ao xogador nun mundo fantástico que reacciona e evolución en función do xeito de xogar, mudando os elementos do fondo, os sons, os efectos especiais e até a forma das pezas de Tetris, que bailan, producen música e esbouran en perfecta sincronía co xogo.
Tetris Effect tamén incluirá modos de xogo coñecidos (Marathon, Ultra e Sprint), outros orixinais e incluso unha nova mecánica que permite ir á Zona para deter o tempo e así poder manobrar en situacións difíciles das que poderá saír chegando incluso a poder eliminar 12 liñas de vez.
Durante o E3 poderase probar este curioso xogo do que irán dando máis detalles antes do seu lanzamento.