Nova sección de motos para a web EllasConducen.com

A incorporación das mulleres ao mundo das dúas rodas está a medrar de xeito vertixinoso dende hai uns anos, debido en gran parte ao seu abaratamento, á súa comodidade e tamén a que agora está permitido conducir motos de menos de 125 cc con carné B-1.
É por isto que, o primeiro portal do motor “dedicado exclusivamente ao público feminino”, EllasConducen.com, vén de inaugurar unha nova sección do catálogo de motos na súa web, sabedores os seus responsables de que o seu público obxectivo está a converterse en cliente potencial dos vehículos de dúas rodas de xeito paseniño.
Neste apartado aparecen as últimas novidades do mercado en materia de motocicletas, con análises rigorosas das súas características e consellos de compra para que as moteiras dispoñan de toda a información precisa á hora de escoller o vehículo que mellor se adapte ás súas necesidades e gustos.
Este catálogo contén, asemade, unha ficha informativa dos distintos modelos de motos existentes e ofrece a posibilidade de incluír comentarios das usuarias para intercambiar opinións e contrastar información con outras internautas.
Din os responsables da web que as moteiras se están a facer devagar un espazo no mundo das dúas rodas. O pistoletazo de saída, aseguran, produciuse en 1940, cando Dot Robinson fundou en EE.UU The Motor Maids, o primeiro club feminino de motociclismo do mundo. Dende entón, a moitas mulleres “picoulles o vermiño da estrada”; tanto foi así que mentres no ano 1985, a mítica Harley Davidson vendeu apenas 600 unidades a mulleres, no 2005 superou as 30.000 unidades.
Neste intre, o portal ofrece información dos modelos, Gilera GP800, Suzuki Intruder, Kawasaki KLX250, Suzuki GSX-R 1000, Honda DN-01, Honda Forza 250, Kawasaki ZX-6R e BMW K 1300; pois ninguén dubida que na variedade está o gusto.
Por último, este portal creado en 2007 coa finalidade de axudar e informar a tódalas mulleres interesadas no mundo do motor que non saben acceder ás web normais para calquera usuario, ofrécelle a posibilidade de contratar o seguro da súa moto con MAPFRE.