O Ateneo Ferrolán prosegue co seu labor de dixitalización de arquivos

Os traballos de Recuperación, dixitalización e posta en valor da biblioteca-hemeroteca do Ateneo Ferrolán, seguen a desenvolverse –segundo fontes da propia entidade- polo bo camiño e xa se vén de ampliar o proxecto coa doazón de máis de 230 títulos editados polo servizo de publicacións da Fundación e coa cesión ao Ateneo da colección de microfilmes de El Correo Gallego, correspondentes ao período 1878-1974.
De feito, tal foi a evolución da iniciativa que xa se teñen rematados os seguintes traballos:
 Dixitalización de fondos de prensa únicos e de gran valor histórico e social da hemeroteca do Ateneo, correspondentes a cabeceiras editadas en Ferrol no século XIX e comezos do XX, e dos que o Ateneo conserva os únicos exemplares. Trátase dos xornais El Radical, La Democracia, Diario Ferrolano, Faro de Ferrol, El Eco Ferrolano, Galicia, La Lucha, La Voz del Obrero, El Porvenir, La Voz de la Liga, La República, El Pueblo, El Bien del Obrero, El Chicote, Revista Acorazado e La Cruzada entre outros.
 Catalogación e dixitalización da colección de fotografías La sociedad española de construcción naval desde 1900.
 Dixitalización dos cinco exemplares existentes na Biblioteca Municipal de Ferrol dos Anuarios de Debates e Conferencias publicados polo Ateneo entre 1903 e 1907, dos que o centro ferrolán non conserva orixinais en papel.
 Ampliación do equipamento da biblioteca-hemeroteca do Ateneo Ferrolán, incluíndo a adquisición de cinco ordenadores persoais para uso público e interno, así como de diverso material informático.
Esta entidade fundada en 1879 vén de anunciar, asemade, que conta con servizo Wi-Fi nas súas dependencias para o seu uso libre por parte de tódolos usuarios e usuarias.