O CLAG organiza en xuño un curso sobre escenarios virtuais

O Cluster Audiovisual Galego (CLAG) vén de abrir o prazo para profesionais do sector que os introduce directamente nos recursos máis avanzados para dar forma a todo tipo de localizacións a partir das novas tecnoloxías. Ou sexa, para situar aos personaxes dunha serie, dunha curta, dun programa de TV ou dunha longametraxe en espazos (baseados en contornas reais ou inventados) que por métodos tradicionais non serían accesibles. O curso Dirección, deseño e execución de escenarios virtuais para ficción-cinema celebrarase no mes de xuño en Santiago.
En palabras do CLAG, búscase con esta actividade “formar aos profesionais do audiovisual galego en tecnoloxías innovadoras que permitan a creación de escenarios virtuais a través do uso de técnicas de croma”. O prazo para enviar as solicitudes cérrase o vindeiro 5 de xuño.
Entre os obxectivos deste curso está “a mellora da capacitación do capital humano das empresas do sector a través da formación nunha tecnoloxía innovadora que permitirá aos profesionais mellorar a súa competitividade e adaptarse aos cambios que se poidan producir na industria audiovisual”.
Dirixido a profesionais do sector audiovisual en activo pertencentes a empresas galegas ou que teñan o seu centro de actividade en Galicia. Este curso, de 32 horas de duración, celebrarase os días 18, 25 e 26 de xuño, na sede do Centro de Supercomputación de Galicia (CESGA), en Santiago, e o día 19 de xuño na sede da empresa Ficción</strong, no Milladoiro (Ames), en horario de 9.30 a 14.30 horas e de 15.30 a 18.30 horas.
O curso será impartido por profesionais da empresa Leonard Blum, estudio de publicidade con sede en Barcelona, especializado en técnicas de retoque avanzadas, cinema e efectos especiais.