O Concello de Lugo dota os servizos municipais de 300 computadores novos

A alcaldesa Lara Méndez nunha imaxe de arquivo

O Concello de Lugo deu a coñecer esta semana un novo e importante avance en materia de eAdministración, un ámbito de desenvolvemento que inclúe novas ferramentas tecnolóxicas para axilizar e optimizar a relación que manteñen as institucións públicas coa cidadanía. En concreto, o Goberno lucense anunciou que vai dotar os servizos municipais de 300 computadores novos.
Segundo fixo saber a alcaldesa Lara Méndez, trátase dunha serie de “equipos para contribuír á renovación dos dispositivos actuais” e “cos que se pretende non só avanzar na implantación da Administración Electrónica senón tamén dotar ao persoal de ferramentas áxiles para que poidan desenvolver o seu traballo coa maior eficacia posible en beneficio da cidadanía”.
A adquisición do material foi adxudicado á empresa Telefónica Soluciones de Informática y Comunicaciones de España SAU, por valor de 218.551’75 €. A empresa deberá facer entrega dos equipos informáticos nun prazo de doce semanas dende a data de sinatura do contrato.