O Concello de Santiago de Compostela renova a súa páxina web
venres, 15 de xuño do 2007
Marta Álvarez-Santullano, concelleira de Reforma Administrativa de Santiago,
presentou
o novo deseño da web municipal compostelá e os novos servizos que incorpora.
A portada da web incrementa
o peso da parte informativa e de servizos e trámites, incluíndo un apartado de
descarga directa de impresos, ademais dos xa existentes trámites ou servizos.
Tamén se melloraron a Carpeta Cidadá, o sistema de pagamento en liña e a
calculadora de tributos, e agárdase que en breve se engada a posibilidade de
realizar trámites a través dun certificado electrónico.
Dende o Concello tamén están a traballar para poder incorporar a
posibilidade de solicitar cita previa en calquera dos seus departamentos e a
acceder ó estado dos seus expedientes, así como o acceso á información
catastral, ó padrón municipal e o estado das facturas electrónicas (para
usuarios e empresas que traballen co Concello).
A web tamén permite a posibilidade de crear blogs por parte dos cidadáns na
sección Blog Compostelán
que polo momento conta con 3 bitácoras.
Para incrementar a accesibilidade ós contidos da web do Concello de
Santiago de Compostela tamén estrearon unha versión móbil da mesma baixo o
dominio mobilscq.org que permite achegar a
información publicada dende móbiles, consolas ou PDA.
