O Firefox chega ao 20% de cota de mercado

Durante o pasado mes o Firefox superaría durante 2 semanas o 20% de usuarios de páxinas web

O navegador web de Mozilla leva anos medrando en penetración, e dende Net Applications sosteñen que por fin chegou a ocupar o 20% do mercado mundial de navegadores, quedando aínda moi lonxe do 72% que ostenta o Internet Explorer, pero chegando a un nivel no que non se pode desprezar, de xeito que os creadores de páxinas web que se aferren só á tecnoloxía de Microsoft deberían repensar a súa filosofía de traballo, pois estarían a ignorar a un grupo de usuarios emerxente que chega a uns niveis máis que considerables.
O terceiro navegador en uso sería o Safari con preto do 7% (incluíndo o tráfico dende o iPhone e pese a que os Mac xa ocupen o 8,2% da navegación web, polo que poderiamos deducir que hai moitos maqueiros usando Firefox), mentres que tanto o Opera coma o Google Chrome non chegarían nin ao 1% cada un, polo que non parece que os usuarios se animen a abandonar os seus navegadores (por moito que Google estea detrás dunha destas aplicacións).