O Football Manager renova a súa marca este ano

luns, 6 de agosto do 2018 Marcus Fernández

Sports Interactive e SEGA anuncian hoxe que o lanzamento do agardado xogo Football Manager 2019 terá lugar o 2 de novembro, aproveitando esta franquía para renovar a súa marca, dicindo adeus ao Manager Man que ocupaba as súas portadas dende o Football Manager 2005, para amosar o campo de fútbol dende o punto de vista dun manager mentres cruza o túnel de vestiarios para un grande partido.
O xogo tamén conta con logotipos redeseñados, moitas características novas e melloradas e a implementación da licenza da DFL Bundesliga por primeira vez na serie que promete avanzar no seu realismo. Este título permitirá percorrer os 50 países máis futboleiros do mundo, prosperar con calquera dos 2.500 mellores clubs e mesmo buscar entre un catálogo de máis de 500.000 xogadores e persoal reais (de feito, o xogo conta coa licenza completa de 26 ligas).
Football Manager 2019 xa está dispoñible en reserva para PC e Mac a través de Steam cun 10% de desconto (deixando o seu prezo de 49,49 euros), aínda que cómpre destacar que tamén haberá un Football Manager 2019 Mobile (para iOS e Android) que sairá simultaneamente e permitirá así gozar desta experiencia de simulación en calquera momento e lugar.

Vídeo de presentación do Football Manager 2019

PUBLICIDADE