O Game Pass renova a súa oferta de xogos

Xbox continúa a súa expansión de contidos co lanzamento dunha nova remesa de xogos dispoñibles para os subscritores de Game Pass, incluíndo estreas simultáneas, títulos moi agardados e remasterizacións de franquías históricas como Warcraft e Call of Duty. A chegada desta nova vaga coincide co recente Xbox Games Showcase, que deixou unha chea de anuncios para os fans da consola de Microsoft.
Dende esta semana xa se poden descargar títulos como FBC: Firebreak, un shooter cooperativo en primeira persoa ambientado nunha axencia federal asediada por forzas paranormais, e Lost in Random: The Eternal Die, unha aventura de acción táctica onde os dados teñen un papel clave no combate. Tamén se incorpora Crash Bandicoot 4: It’s About Time, unha viaxe interdimensional protagonizada polos icónicos Crash e Coco.
Nas vindeiras semanas, os xogadores poderán gozar de máis propostas como Star Trucker e Wildfrost o 18 de xuño, Rematch, un novo xogo de fútbol 5 contra 5 o día 19, ou Volcano Princess, unha mestura entre simulador de crianza e RPG dispoñible a partir do 24 de xuño.
O 26 de xuño marcará unha data clave coa chegada das versións remasterizadas de Warcraft I e II e a edición reforxada de Warcraft III, que traen novas gráficas, melloras de control e elementos sociais modernos ao universo de Azeroth. Ese mesmo día tamén se lanza Against the Storm en consola e nube, un city-builder de fantasía escura xa dispoñible en PC.
O mes péchase o 30 de xuño coa chegada de Call of Duty: WWII, mentres que o 1 de xullo se incorporan Little Nightmares II e Rise of the Tomb Raider, este último de regreso ao catálogo.