O Goberno levará banda larga de última xeración a 2.576 inmóbeis de Guitiriz
mércores, 19 de xaneiro do 2022
O
delegado
do Goberno en Galicia, José Miñones, estivo este mércores 19 en
Guitiriz dando a coñecer diversos proxectos a desenvolver no
territorio para mellorar a calidade de vida da veciñanza.
Segundo dixo, o Executivo central, a través de distintos
ministerios, “traballa na mellora das condicións ambientais, na
rehabilitación de vivendas e na dotación de servizos de acceso a
Internet de alta velocidade para cidadáns e empresas”, detallou.
José
Miñones repasou estes investimentos no transcurso dunha visita
institucional a Guitiriz, onde se reuniu coa alcaldesa, Marisol
Morandeira, acompañado pola subdelegada do Goberno na provincia de
Lugo, Isabel Rodríguez.
A
nivel tecnolóxico, o delegado do Goberno anunciou que Guitiriz vaise
beneficiar da primeira convocatoria do Programa ÚNICO-Banda Larga do
Ministerio de Asuntos Económicos e Avance Dixital para a extensión
da cobertura de Internet de alta velocidade nos concellos, “unha
importante aposta do Goberno para que a conexión da Rede avanzada
chegue de verdade a todo o territorio galego en igualdade”.
A
convocatoria foi adxudicada a Telefónica, que deberá levar a banda
larga de última xeración ata 2.576 vivendas e empresas deste
concello que ata agora carecían deste servizo. O delegado do Goberno
engadiu que na provincia de Lugo o Plan Único mobilizará 16,3
millóns en proxectos, con 10,2 millóns achegados polo Estado. As
actuacións benefician a 64 concellos e 45.514 familias ou empresas.