O Hulk vermello estará dispoñible nunha versión exclusiva do xogo para Xbox 360

Imaxe da exclusiva versión de The Incredible Hulk vendida por GameSpot

Coa película estival chegará ás tendas de videoxogos un novo título de Hulk do que xa falamos hai un par de meses, e que está a sorprender por unha orixinal edición especial que se vende en exclusiva a través da tenda en liña GameStop por 59,99 dólares (38,83 euros) e que permite empregar unha versión vermella de Hulk dende un principio (non se trata dun contido desbloqueable), aínda que tal característica só estará accesible para os usuarios de Xbox 360.
Hai que destacar que na película Hulk é un personaxe verde, e na súa versión en banda deseñada tamén existiu unha versión gris do monstro gamma, pero a cor vermella corresponde a outro personaxe que está a aparecer dende hai 3 meses na serie regular norteamericana (e que é todo un misterio, pois non se coñece a súa identidade secreta) polo que co cambio de cor do personaxe do videoxogo se estaría a facer un xesto aos seguidores do cómic.

Anuncio da edición especial do xogo

Dende GameSpot aseguran que o Hulk vermello non é só un cambio de cor do personaxe principal do xogo, senón que ten un deseño de seu, desenvolvido baseándose no novo personaxe aparecido nos comics.
Descoñecemos se será posible que esta versión chegue a Europa a través doutra canle de distribución, pois aínda que sexa posible mercar o xogo dende España (pagando uns portes de 25,99 dólares) a versión comercializada é NTSC (o formato de vídeo americano, e incompatible co sistema europeo, PAL).