O ITG mostrou as vantaxes das tecnoloxías colaborativas para construír mellor
xoves, 9 de maio do 2019
Hoxe
na sede do Instituto Tecnolóxico de
Galicia (ITG) falouse de construción e dos novos xeitos de
abordar un proxecto no sector, uns modelos en gran parte importados
do desenvolvemento informático participativo, intelixente,
comunitario e sen cancelas. Estes e outros temas tratáronse no
primeiro Encontro #GaliciaBIM 2019, organizado polo ITG co obxectivo
de abordar o presente e o futuro do Building Information Modeling
(BIM), a metodoloxía de traballo colaborativa para a creación e
xestión de proxectos de construción cuxo obxectivo é centralizar
toda a información nun modelo dixital único creado entre todos os
seus axentes.
A
xornada, que tamén contou co impulso do Colexio Oficial de
Arquitectos de Galicia (COAG) e do Colexio de Enxeñeiros de Camiños,
Canles e Portos de Galicia (CICCP), comezou poñendo o foco no asunto
central da xuntanza: o modelo BIM. Este, sinalouse, supón a
evolución dos sistemas de deseño tradicionais baseados no plano, xa
que incorpora información xeométrica (3D), de tempos (4D), de
custos (5D), ambiental (6D) e de mantemento (7D). O sistema abrangue
desde a execución do proxecto até o ciclo de vida do edificio, “o
que supón unha clara vantaxe competitiva no sector”, explicouse.
Na
cita participou o director xeral do Instituto Galego de Vivenda e
Solo da Xunta de Galicia (IGVS), Heriberto García, quen interveu no
acto inaugural lembrando “a forte aposta do IGVS pola incorporación
da metodoloxía BIM aos proxectos da entidade”, que xa empregou
esta metodoloxía nalgúns proxectos e que será incluída nos pregos
de futuras licitacións sen que supoña unha limitación á
concorrencia.
En
palabras do director da área de Construción Sustentábel de ITG,
Óscar Martínez, “divulgar os beneficios da metodoloxía BIM
permitirá ás empresas da nosa contorna situarse na vangarda da
profesión a nivel internacional”.
No
transcurso da xornada participaron empresas e entidades do sector que
puxeron en común a súa experiencia como usuarios BIM. É o caso de
es.BIM (Comisión impulsada polo Ministerio de Fomento), easyBIM, C&S
Consulting, CIMARQ, Martínez Segovia, Escola Técnica Superior de
Arquitectura da Universidade da Coruña, COAG, CICCP de Galicia e o
Instituto de Tecnoloxía da Construción de Cataluña (IteC).
Que
é BIM?
Building Information Modeling (BIM) é
unha metodoloxía de traballo colaborativa para a creación e xestión
de iniciativas de novos edificios. A súa finalidade é centralizar
toda a información dun proxecto nun modelo único de información
dixital creado por todos os seus axentes. BIM implica un
desenvolvemento dos sistemas de deseño tradicionais baseados no
plano, xa que incorpora información xeométrica, de tempos, de
custos, ambiental e de mantemento. Froito do seu espírito de
traballo en mancomún xurdiu o procedemento openBIM, baseado no uso
de estándares abertos para favorecer o intercambio de datos e
recursos entre axentes, procesos e aplicacións.