O Real Madrid estrea plataforma audiovisual en liña

Aínda que estamos afeitos a que as plataformas de vídeo baixo demanda saian coma cogomelos, de cando en vez sorprende algunha proposta por nacer de xeito independente en vez de agregarse a algún outro proxecto de maior tamaño, como é o caso de RM Play, a nova plataforma OTT do Real Madrid, que está accesible vía web e tamén para dispositivos con iOS e con Android, buscando así satisfacer a ansia de contido dos madridistas, aos que achega xa máis de 700 horas de vídeo que irá medrando paulatinamente.
Os seareiros do Real Madrid poderán acceder en RM Play á actualidade de todas as seccións do club (resumos, convocatorias de prensa, entrevistas e especiais), o arquivo histórico de todas as seccións (incluíndo os resumos dos últimos 15 anos do primeiro equipo), tráilers e o primeiro capítulo das súas series orixinais e o sinal en directo de RMTV na súa versión en español e internacional, así como os informativos dos últimos 15 días baixo demanda.
Por outra banda, os usuarios Premium e Junior poderán gozar tamén de partidos completos (actuais e históricos), contido exclusivo e todos os capítulos das series e películas orixinais desta nova plataforma.