O Simon, o Tamagotchi e outras maquiniñas recuperadas para xogar na web

O Internet Archive continúa co seu traballo de preservación, que dende hai máis de 4 anos inclúe a videoxogos como máquinas recreativas e ordenadores persoais con sistemas operativos obsoletos, que grazas á emulación poden actualmente rememorarse vía web, sorprendendo agora coa recuperación de numerosas maquiniñas comercializadas entre os anos 70 e 90 que poderían considerarse precursoras das consolas tanto portátiles como domésticas actuais.
Estes trebellos, considerados comunmente coma xoguetes, van dende grandes éxitos como o xogo de memoria Simon e a mascota virtual Tamagotchi, ata xogos baseados en máquinas recretivas (como Q*Bert) ou títulos baseados en licenzas como Batman ou Robocop, entre as que figura incluso Doraemon, o gato cósmico.
Estamos ante trebellos autónomos, que non precisaban conectarse ao televisor, e que nuns casos podía levarse a onde se quixera, mentres que noutros estaban pensados para o seu uso sobre a mesa, simulando unha máquina recreativa tradicional.
Empregaban tecnoloxías moi rudimentarias, e en moitos casos eran versión moi reducidas de xogos de recreativa, que buscaban así chegar ao mercado de consumo, xa que estas maquiniñas tiñan prezos bastante contidos, de xeito que probablemente o elemento que afectaba máis ao seu custo de posesión era que funcionaban con baterías.
Para poder crear estes emuladores en moitos casos foi preciso desmontalos totalmente para poder dixitalizar os deseños dos seus paneis LCD e así poder replicar os seus gráficos na súa versión dixital. Un traballo bastante complexo que permite así a preservación a longo prazo duns produtos electrónicos que doutros xeito perderíanse para sempre por mor da súa degradación natural.