O Star Wars Battlefront orixinal destaca entre os Xogos con Gold de febreiro

Microsoft desvelou os que serán os Xogos con Gold do mes de febreiro, que recibirán os subscritores de Xbox LIVE Gold e Xbox Game Pass Ultimate, e aínda que os títulos para Xbox One incluídos son de calidade, os xogos retrocompatibles do mes son moito máis rechamantes pola presenza de todo un clásico: Star Wars Battlefront.
A partires do 1 de febreiro estará dispoñible o xogo de Xbox One TT Isle of Man, un título de motociclismo que convida a superar o reto do monto Snaefell, memorizando cada sección e tomando as curvas á perfección mentres se corre a 300 quilómetros por hora.
O segundo xogo para Xbox One de febreiro, dispoñible a partir do 16 de febreiro, será Call of Cthulhu, xogo oficial inspirado no clásico xogo de rol de lapis e papel Chaosium inspirado no universo de H. P. Lovecraft, no que teremos que investigar as mortes dunha familia nunha illa remota onde nada é o que parece. O investigador privado Pierce terá problemas para manter a cordura, tendo dificultades para discernir o que é real, nun contorno no que a escuridade trata de seducilo.
De Xbox 360 teremos Fable Heroes, un hack-and-slash no que poderemos unir forzas con outros tres xogadores, que pouco ten que ver co que estamos afeitos dentro da franquía de Fable, pero que pode resultar divertido para quen simplemente busca un momento de lecer cos amigos.
Pero claramente a estrela do mes é o xogo para a Xbox orixinal Star Wars Battlefront, dispoñible a partires do 16 de febreiro, e que permite participar en batallas memorables das 6 primeiras películas de Star Wars combatendo no campo de batalla cunha chea de armas e vehículos en calquera dos dous bandos, de xeito que tanto poderemos ser un soldado de asalto imperial como un piloto dun X-Wing. Estamos ante un dos xogos máis aclamados entre os afeccionados á franquía creada por George Lucas, que en 2015 recuperouse como marca por parte de DICE, con secuela en 2017, confirmando a forza desta propiedade intelectual.