O apagamento analóxico entrará en Galicia pola Fonsagrada a primeiros de abril

A Fonsagrada será a primeira comarca de Galicia na que dará comezo o apagamento analóxico de televisión. A principios de abril, os veciños deste concello lugués deixarán de ver o sinal polo sistema vello, co que se dará comezo á transición ó futuro dixital, proceso no que a empresa Retegal, dependente da Xunta, investirá 14 millóns de euros en 130 centros emisores.
A previsión é que a cobertura prevista pola empresa pública achegue o sinal das dúas canles da TVG e das dúas canles privadas ó 98 por cento da poboación galega. O apagamento da Fonsagrada enmárcase no plan piloto de transición á TDT e o feito de escoller este concello de Lugo é un xeito de coñecer a reacción da poboación rural ante a nova tecnoloxía, nunha zona marcada polo espallamento xeográfico e pola elevada idade media dos seus habitantes.
A Xunta desenvolverá nas vindeiras semanas unha serie de iniciativas de difusión da nova tecnoloxía, tendentes a achegar á poboación métodos prácticos para adaptarse á emisión dixital, por outra banda xa en probas desde hai meses. A este respecto, a Dirección Xeral de Comunicación porá en marcha incentivos de carácter privado e público nas zonas onde se vai producir o apagamento analóxico, que comezará a finais de ano polo interior de Ourense limítrofe con Castela. Ó longo de 2009 apagarase o sinal analóxico en Santiago, A Coruña-Ferrol, a cidade de Ourense e, xa para rematar, a principios de abril farano Pontevedra-Vigo e a cidade de Lugo.
Sobre a emisión do sinal da televisión portuguesa en Galicia, non se albisca a medio prazo, sinalou a Xunta, xa que escapa ás súas competencias e (engade) suporía un investimento semellante de 14 millóns de euros, amais doutros problemas técnicos, económicos, de publicidade e de proxectar cómo se verían as canles galegas en Portugal.
O apagamento analóxico afecta inicialmente ó sinal das televisións públicas e está pendente aínda o desenvolvemento dixital das privadas.