O apagamento analóxico non se retrasará segundo o ministro de Industria

Sebastián presentando o apagamento analóxico que terá lugar en Soria no verán

Nos últimos días se estaba a rumorear a posibilidade de que o ministro de Industria, Comercio e Turismo, Miguel Sebastián, anunciase que o apagamento analóxico da televisión en España se retrasase ata 2012, o que finalmente non se confirmou, pois Sebastián anunciou que tal operación se adiantará a Soria o vindeiro 23 de xullo coma xa pasou no concello lugués da Fonsagrada.
Deste xeito, durante o verán os sorianos deixarán de recibir o sinal televisivo en analóxico, tendo que adaptarse á TDT con máis presa que o resto do Estado. Esta caso seguirá os mesmos pasos que o da Fonsagrada, servindo como experiencia piloto para estudar o comportamento dos consumidores ante o cambio tecnolóxico. Os cidadáns tamén poderán optar a axudas para a compra de receptores de TDT (de 60 euros se inclúen Mhp) e para adaptar as antenas dos seus edificios (de 450 euros).
Os rumores sobre as demoras do apagamento analóxico viñan provocados por distintas presións de grupos mediáticos que pretenden que se permita a creación de servizos de pago a través da TDT, o que complicaría bastante o tránsito á dixitalización, pois boa parte dos receptores actuais non soportarían estes servizos avanzados (os receptores deberían contar con lector de tarxetas de acceso condicional).
Pero todos estes potenciais cambios non parecen ser beneficiosos para unha tecnoloxía que está a atopar moitos atrancos para introducirse nos fogares, e aínda que o 54,2% dos edificios xa adaptasen as súas antenas, se vendesen 9,7 millóns de sintonizadores de TDT e se estime que o número de fogares conectados é do 32,1%, o certo é que a nivel de consumo a Televisión Dixital Terrestre só ten unha cota de pantalla do 13%, o que debería mellorar moito antes do apagamento dixital.
Estes malos resultados poderían estar provocados pola pouca calidade dos contidos das canles de TDT que non se poden recibir en analóxico, que normalmente se limitan a reposicións, teletendas e outros espazos de pouco interese para os espectadores.