O apagamento analóxico nos EE.UU. finalmente será o 17 de febreiro

Esta semana falabamos de que a transición da televisión analóxica á dixital nos EE.UU. aprazábase do 17 de febreiro ao 12 de xuño, pero finalmente esta lei non superou todos os trámites para a súa aprobación, pois precisaba de dous terzos da cámara de representantes, e só acadou un 61% dos apoios, o que deixará a 6,5 millóns de fogares norteamericanos sen estar preparados para recibir o sinal da TDT, e sen satisfacer a uns 2,5 millóns de cidadáns que están en lista de espera para recibir o cupón de desconto para mercar un receptor de TDT (e que podería non chegar nunca, pois os fondos económicos orzados para tal partida están esgotados).
Parece difícil de crer que sexan capaces de realizar o apagamento analóxico en pouco menos dun mes nun momento no que a poboación está confusa, o Goberno non cumpriu coas subvencións prometidas (o que deixaría sen receptores aos cidadáns con menos poder adquisitivo) e mesmo podería supor un duro golpe para as canles de televisión, que non poderían chegar a millóns de espectadores.