O coñecemento dixital é un dos principais eixos do novo modelo de competencias profesionais docentes que impulsa a Xunta
mércores, 29 de marzo do 2023
Esta mañá
inaugurouse en Santiago de Compostela o Congreso sobre Competencias
Profesionais Docentes coa participación de máis dun milleiro de docentes para
debater o futuro do ámbito educativo, e onde Román Rodríguez, conselleiro de Cultura,
Educación, FP e Universidades, sinalou que o reforzo do coñecemento dixital, da
igualdade e da inclusión, a aposta pola educación emocional e a adquisición de
competencias laborais son algúns dos principais eixos nos que se centra o novo
modelo de competencias profesionais docentes impulsado pola Xunta de Galicia
para “aportar valor engadido” ao actual modelo educativo galego.
O titular de
Educación do Goberno galego explicou que este novo modelo, que actualiza o que
a Consellería deseñou de xeito pioneiro en 2015, é unha ferramenta fundamental
para garantir “o nivel de excelencia” que ten acadado o sistema educativo
galego nos últimos anos, xa que o fortalecemento dos coñecementos, capacidades
e aptitudes docentes “exercerán de factor de diferenciación do noso modelo”.
“Ser un bo profesor hoxe -explicou- esixe unhas cualidades, competencias,
habilidades e destrezas diferentes ao que considerábamos un bo profesor hai 15
anos”.
Para iso, a
Consellería traballa en propiciar que o profesorado de todas as etapas estea o
mellor preparado e formado ante as demandas actuais e futuras, así como
impulsar a conexión e a adecuación entre os sistema educativo e a sociedade,
dado que os perfís profesionais esixen cada vez unha maior capacitación e
solvencia en todos os campos “Queremos garantir a competitividade dos futuros
profesionais cun modelo educativo que discorra paralelo ás necesidades sociais
e do tecido produtivo”, sinalou.
Así pois, o novo
marco competencial recolle a formación a dúas escalas: por unha parte a
formación inicial que reciben os docentes nas distintas facultades de Ciencias
da Educación e, doutra parte, da formación continua e a reciclaxe e a
adaptación constante no día a día de exercicio profesional. Para iso, a
Consellería traballa en colaboración cos técnicos dos Centros de Formación do
Profesorado e tamén en colaboración cos decanos das distintas facultades de
Educación.