O ex vicepresidente do Instituto Politécnico de Porto, Antonio José Marques, visitou o CITIC
mércores, 30 de maio do 2018
- O profesor Antonio Marques (no centro) co director e o subdirector do CITIC
Esta
semana o
Centro de Investigación TIC (CITIC) da Universidade da Coruña
contou coa visita do profesor Antonio José Marques do Instituto
Politécnico de Porto, que tivo ocasión de coñecer as liñas de
actividade do centro galego, algunhas delas relacionadas directamente
coa aplicación de novas ferramentas no ámbito da atención médica
(a saúde), da que teñen abrollado proxectos como eDSalud,
revolucionaria tecnoloxía de telemedicina que rompe fronteiras e
derruba atrancos no ámbito da atención e os diagnósticos en tempo
real.
Precisamente,
Marques é terapeuta ocupacional e dedícase á saúde mental e
innovación social, sendo responsábel de varios cursos de posgrao,
proxectos I+D e teses de máster e doutoramento. Amais, foi
vicepresidente do Instituto Politécnico de Porto e da súa Escola
Superior de Saúde. Tamén é consultor e investigador da
Universidade J. F. Kennedy de Bos Aires (Arxentina), da Universidade
de Vic de Barcelona e da Universidade Federal de San Carlos de São
Paulo (Brasil). A día de hoxe, traballa sobre todo nas seguintes
liñas de investigación: na alfabetización e o benestar en saúde
mental, en metodoloxías interactivas e de realidade virtual na
rehabilitación de persoas con doenzas mentais e, tamén, na
promoción da autoxestión destas enfermidades. Asemade, coopera no
impulso de iniciativas innovadoras de inserción no mercado de
traballo de poboacións vulnerábeis.
Durante
a súa estadía no CITIC e a respecto da mesma, Marques salientou a
importancia de estar en comunicación directa coa equipa do CITIC
para “profundar no coñecemento das competencias, recursos
existentes e das relacións entre as dúas institucións e grupos de
investigación, planeando a concreción de varios proxectos conxuntos
para os próximos anos nas diversas áreas da misión das
institucións de ensino superior, ou sexa, ensino e formación,
investigación e extensión comunitaria”.
O
investigador portugués tamén expresou a súa arela de establecer
liñas de traballo conxuntas co centro galego: “Xa estamos a
planificar unha serie de aplicacións e a realización de proxectos
de investigación en colaboración, que combinan o uso das
tecnoloxías no contexto da saúde e a rehabilitación, co fin de
atopar solucións innovadoras para responder a problemas sociais
relevantes para o norte de Portugal e Galicia”.
A
visita enmarcouse no proxecto Iacobus de cooperación e intercambio
de persoal de centros de ensino superior da Eurorrexión Galicia -
Norte de Portugal, facilitando a posta en común de actividades
formativas, de investigación e de divulgación.