O proxecto galego ABZU desenvolve unha plataforma para impulsar a transformación dixital dos portos

Gabriel Torrente, impulsor principal do proxecto

O proxecto galego ABZU, que actualmente recibe impulso ao abeiro de Sherpa Journeys (Sherpa do Mar) desenvolveu unha plataforma para impulsar a transformación dixital nos portos. Liderada polo consignatario de buques Gabriel Torrente e desenvolvida pola empresa galega Imatia, esta aplicación pretende “aglutinar a todos os actores da cadea portuaria para facilitar a súa comunicación interna ante as diversas variables que ocasiona a chegada e estadía dun buque”.
O obxectivo, en palabras de Torrente, “é optimizar o tempo e o custo das operacións portuarias, incluíndo a todas as empresas con participación activa no porto, a través dunha comunicación directa e fluída”. Torrente engade que “tendo en conta que de media un operador recibe un centenar de barcos ao ano, chegaría a aforrar 50.000 euros en comunicacións ineficientes grazas a esta aplicación, que destaca por poñer en xogo máis transparencia e confianza porque todos os movementos quedan rexistrados”.
O responsábel do proxecto ABZU engade que esta fin de semana realizarase a primeira proba piloto na zona portuaria de Burela cun buque de gran tonelaxe con bandeira finlandesa procedente de Portugal na que participarán as oito empresas implicadas na atracada. O obxectivo é que o seu uso sexa estendido a outros portos de Galicia, España, Portugal e Latinoamérica, “cuestión na que xa se está avanzando”, explica.
O proxecto atópase actualmente na segunda fase do seu desenvolvemento, que contempla a integración da tecnoloxía de cadea de bloques (blockchain) na contorna portuaria para acelerar os pagos cen por seguros e inmediatos a todas as empresas implicadas nunha operativa portuaria. Con carácter paralelo, Torrente tamén traballa na incorporación de tecnoloxías de rastrexabilidade (o que se coñece como trazabilidad) de produtos pesqueiros e distintas mercadorías, así como na tokenización portuaria, que considera “un dos alicerces fundamentais dos portos 4.0”. Trátase dunha iniciativa pioneira a nivel internacional pola que se premiarán as boas prácticas das compañías navieiras en materia de Responsabilidade Social Corporativa.
Sherpa do Mar é un proxecto integrado no Programa de Cooperación Transfronteiriza INTERREG V-A España-Portugal (POCTEP) 2014-2020, co-financiado nun 75% por fondos FEDER, cuxa finalidade é pór en marcha unha rede transfronteiriza de emprendemento no ámbito mariño-marítimo e da economía azul, a través do programa Sherpa Journeys. O proxecto está liderado pola Universidade de Vigo, a través do grupo de investigación REDE, o Campus do Mar e a Oficina de I+D, e nel participan o Consorcio Zona Franca de Vigo, a Axencia Galega de Innovación (GAIN) e as universidades de Santiago e A Coruña.
Por parte de Portugal, participan a Associacão de Transferência de Tegnologia de Asprela (UPTEC), a Ou.Porto-Innovação da Universidade do Porto (UPIN), o Centro Interdisciplinar de Investigação Marinha e Ambiental (CIIMAR) e Fórum Oceano-Associação dá Economia do Mar.