O proxecto galego E-Space dotará de intelixencia os interiores dos vehículos
luns, 15 de xullo do 2019
O
coche intelixente xa non é unha utopía. Estase a impulsar ben preto
da nosa casa: dende a Unidade Mixta de Investigación E-Space. Este
mes de xullo puidemos saber máis detalles do proxecto co gallo da
posta en marcha oficial da unidade e da visita do conselleiro de
Economía, Francisco Conde, á sede do Centro Tecnolóxico de
Automoción de Galicia (CTAG), no Porriño, que é onde colle
corpo a devandita UMI da man do CTAG e o Grupo Antolín, co apoio
director da Axencia Galega de Innovación (GAIN). O obxectivo da
unidade é crear novas solucións de electrónica avanzadas que doten
de intelixencia aos compoñentes do interior de cara aos futuros
coches eléctricos e conectados.
A
Unidade de Mixta de Investigación E-Space carrexa un investimento en
Galicia de preto de 2,3 millóns de euros, dos que a Xunta achega o
30%, para avanzar, a través da aplicación de tecnoloxías que
marcan un antes e un despois (tecnoloxías disruptivas)
na investigación de conceptos asociados a elementos do interior do
vehículo, “incorporando a electrificación e respondendo ás
necesidades do mercado”, lembrou o conselleiro.
En
termos máis concretos, a UMI fai avanzar conceptos “esenciais para
o futuro do sector do motor”, como son a iluminación funcional,
sistemas de recoñecemento HMI para unha mellor relación entre o
usuario e o automóbil e a inclusión de sensores para favorecer o
confort e a seguridade. Segundo Conde, “os elementos do interior do
vehículo van ser elementos diferenciadores permitindo integrar novas
solucións e servizos”.
O
conselleiro agradeceu o traballo que está a facer o CTAG que conta
con 400 profesionais que están a deseñar novos prototipos e
optimizando proxectos e puxo en valor ao Grupo Antolin “por
identificar que en Galicia existe un espazo para xerar valor e
diferenciarse e para desenvolver estas tecnoloxías”. De feito,
destacou que o Grupo Antolín ten presenza en 28 multinacionais.