O proxecto galego Montenoso, recoñecido no prestixioso certame internacional Prix Ars Electronica
martes, 3 de xuño do 2014
A edición 2014 do
certame Prix Ars Electrónica,
se cadra o festival de meirande prestixio dentro da arte dixital e
multimedia, terá presenza galega. Máis polo miúdo a dos
responsábeis do proxecto Montenoso,
que obtivo un importante recoñecemento no dito certame, segundo
sinalan os creadores da dita iniciativa “o primeiro recoñecemento
de Prix Ars Electronica que vai dar a un proxecto galego”. En
detalle, obtivo a Mención de Honra na categoría Comunidades
Dixitais pola proposta Comúns rurais comúns
dixitais.
En total, 2.703
aplicacións foron emitidas dende 77 estados para as seis categorías
nas que se divide o festival. Os premios outorgaranse no Ars
Electronica que se vai celebrar do 4 ao 8 de setembro en Linz,
Austria.
Segundo engaden os
responsábeis de Montenoso, este é un proxecto colaborativo,
transparente e aberto, “que xorde co obxectivo de promover e
revalorizar as comunidades de montes veciñais en man común de
Galiza e outros tipos de comúns rurais”. O proxecto, explican,
procura traballar os bens comúns como espazos de socialización e de
transferencia de coñecemento.
Consta, na parte
tecnolóxica, dunha plataforma en liña para a colaboración dos seus
membros (os integrantes das comunidades de montes do noso país a
través) a través dunha base de datos que vencella unha cartografía
expandida, un sistema de visualización de datos, un noticiario e
unha wiki semántica.
Para a súa
materialización, os impulsores de Montenoso botaron man de software
e licenzas libres como por exemplo as Creative Commons,
por ser este tipo de ferramentas as que, a fin de contas, máis se
asemellan ao xeito ancestral e colectivo de traballar e xestionar os
nosos montes. Dito doutro xeito: proxectos como Montenoso son unha
adaptación fiel ao plano tecnolóxico dunha realidade coa que
levamos convivindo durante séculos. “Os montes veciñais en man
común”, explican, “son un tipo de terras comunais que
representan un modelo de propiedade que racha coa dicotomía clásica
de público e privado, sendo unha alternativa de propiedade
colectiva”. E engaden: “A especifidade destas terras é
determinada polo feito de que os propietarios son as persoas que
viven no lugar, e non se poden herdar, senón que pasan de veciñas/os
a veciñas/os”.
Montenoso traballa con
estas comunidades veciñais desde as súas realidades, nun micro
nivel, combinando o potencial político e artístico dos sistemas
dixitais con outras redes offline. Estamos polo tanto ante un
grupo transdisciplinar de persoas “que traballan dende as artes
dixitais, o estudo dos comúns, a comunicación en liña, o
empoderamento e axitación rural e a arquitectura social”, tal e
como se define o colectivo impulsor deste proxecto, unha fronte
integrada polos seguintes colectivos e persoas:
Rural Contemporánea _
Iñaki López
Asociación Artesáns de
innovación _ Fran Quiroga
Fur Alle Falle _ Vanesa
Castro
Tecnoloxías Apropiadas
_Alex Mikelinos
Constelaciones_Andrea
Olmedo
Todos eles traballan con
distintas comunidades de montes veciñais en man común como as de
Argozón, Valladares, Mántaras, Torres-Vilamateo, Mouriscados,
Guillade e Ombre. Malia contar co apoio de institucións como o
Medialab Prado, Intermediae, o GIST-IDEGA da USC, ou o Museo do Pobo
Galego, sinalan que “ata o momento non se dispón de ningún tipo
de financiamento”. E explican ao fío deste baleiro de apoios: “A
precariedade caracteriza o proceso de traballo destes colectivos polo
que dende Montenoso aproveitamos a ocasión para reivindicar un apoio
real das institucións culturais galegas neste tipo de proxectos”.