O sector turístico compostelán contará co asesoramento formativo de expertos en turismo e TIC
venres, 9 de outubro do 2020
Expertos
en Turismo e novas Tecnoloxías da Información e a Comunicación
(TIC) impartirán en Compostela un curso dirixido ás empresas, aos
autónomos e aos profesionais locais do sector. O obxectivo:
facilitarlles a plena adaptación ás novas esixencias dixitais que
marca a pandemia, onde boa parte das operacións e actividades
turísticas (xestión, promoción, comunicación, reservas, etc)
pasan a ter unha marcada vertente online. O
encargado de coordinar o curso é o Centro de Estudos e
Investigacións Turísticas (CETUR) da Universidade da Santiago.
O
curso, que será impartido totalmente online, achégase como
unha resposta ás demandas de actualización do sector turístico en
novas tecnoloxías, “nun momento no que a presenza en Internet é
crucial”, explica o Concello, engadindo que a formación terá un
carácter práctica e irá dirixida a hoteleiros, hostaleiros, guías
turísticos, pequenos e medianos touroperadores, firmas de
receptivos, empresas de organización de congresos e eventos, etc.
Formaráselles en ámbitos como a creación e actualización de
páxinas web, en identidades dixitais e marcas, en estratexias de
comunicación, en mercadotecnia en liña, en como aproveitar as
posibilidades da xeolocalización, en como poñer en marcha centrais
de reserva e pasarelas de pagamento online, e “en moitas
outras destrezas informáticas que serán abordadas no curso”.
Tamén se prestará atención ás novas tecnoloxías nas relacións e
a comunicación interna das empresas, así como nas relacións coa
administración.
O
curso, que conta co apoio da Deputación da Coruña, desenvolverase
durante 5 xornadas en horario de tarde. En concreto, levarase a cabo
os xoves 22 e 29 de outubro, e 5, 12 e 19 de novembro de 2020. Será
impartido por profesores universitarios de recoñecido prestixio que
compaxinan a súa actividade académica profesional coa actividade na
empresa privada.
O 22
de outubro, a sesión inicial estará a cargo de Antonio Toré e
Fernando Navarro, investigadores do Instituto de Intelixencia e
Innovación Turística da Universidade de Málaga. O 29 de outubro e
o 5 de novembro contarase coa presenza de José Ramón Porto,
profesor da Universidade de Santiago de Compostela. Finalmente, os
días 12 e 19 de novembro a formación será impartida por Gersón
Beltrán, profesor da UOC e recoñecido consultor en novas
tecnoloxías e turismo.
A
inscrición é de balde ata un límite de 100 prazas, e pódese
realizar enviando un correo electrónico a cetur@usc.es, detallando
nome completo así como empresa ou organización á que se pertence.
O prazo de matrícula ficará aberto ata o 20 de outubro de 2020.