O traballo da Presidencia española coas TIC exponse estes días en Amsterdam
mércores, 26 de maio do 2010
Dende onte, e ata
o mañá xoves, 27 de maio, estase a celebrar en Amsterdam a edición 2010 do
Congreso Mundial de Tecnoloxías da Información (WCIT), un acontecemento que se
inclúe no calendario oficial de eventos da Presidencia española da Unión
Europea (UE), e que reúne aos principais líderes políticos e empresariais co obxectivo
de compartir puntos de vista acerca do papel fundamental que xogan as TIC como factor
dinamizador e de crecemento.
O WCIT, considerado
como “o evento mundial máis importante no
mundo das TIC” está organizado polo World Information Technologies and Services
Alliance co apoio da Comisión Europea, ao
acubillo do ICT Office, e co-organizado polo Ministerio de Asuntos Económicos dos
Países Baixos e o Concello da cidade de Amsterdam.
Este Congreso,
que se celebra cada dous anos, ten como lema nesta edición Desafíos do Cambio, e apóiase en tres principios esenciais:
inspiración, innovación e transformación.
O secretario de
Estado de Telecomunicacións e para a Sociedade da Información, Francisco Ros,
interveu no acto de inauguración do Congreso, e no seu relatorio lembroulle ás
persoas asistentes os principais puntos da Declaración de Granada, aprobada o
pasado mes polos ministros de Telecomunicacións e Sociedade da Información da
Unión Europea e un dos fitos de referencia no desenvolvemento da nova
Estratexia Dixital Europea.
Este documento,
lembrou, “aboga por máis e mellores
infraestruturas capaces de albergar servizos en liña múltiples e de máis alta
calidade nun mercado unificado e de confianza”. Estes servizos, engadiu, “son necesarios para atraer a necesaria
demanda agregada e impulsar a ampla introdución destas tecnoloxías”.
Ros tamén se
referíu ao impacto das TIC na sosteñibilidade, e destacou a cooperación entre a
UE e os países de América Latina e Caribe neste senso mediante a sinatura da
Declaración de La Granja.
Asemade,
referiuse ao traballo da Presidencia española coa industria TIC e pechou a súa
intervención recordando que “o resultado
máis importante da mesma é a Axenda Dixital Europea, que está por vir”.
A presenza española neste Congreso
articúlase tamén mediante a instalación dun pavillón de 100 metros cadrados,
xestionado polo Ministerio de Industria, Turismo e Comercio, dende o que se
promoverá a imaxe exterior de España, dende un punto de vista global porén cun
enfoque centrado nas novas tecnoloxías, tanto na perspectiva do sector público
como do privado.
Neste ámbito, será especialmente relevante a xornada do vindeiro xoves, cando,
no marco das sesións Face to Face, está previsto que todas persoas interesadas se
acheguen ao pavillón español a resolver as súas dúbidas e cuestións que teñan
ao respecto.