O vídeo baixo demanda pola Internet estrea alugueres a 0,99 dólares nos EE.UU.

Nos EE.UU. hai un popular servizo de vídeo baseado en hardware, Vudu, que permite ao usuario alugar e mercar películas a través un receptor (que custa 299 dólares) conectado á Internet e ao televisor. Este tipo de solucións intentan imporse coma alternativas aos videoclubs tradicionais, competindo tamén con plataformas de pago por visión de televisión por cable, pero que podería revolucionar o sector por mor da súa nova promoción, xa que estrearon unha canle de ofertas nas que achegan películas a só 99 centavos.
Hai que indicar que o catálogo ofrecido a ese prezo tan reducido (que normalmente é o que custa unha canción en descarga nas tendas en liña) non se trata de títulos de pouco éxito, senón que é unha selección de 99 películas que irá rotando, e que na actualidade inclúe novidades coma Monstruoso ou Soy Leyenda xunto con clásicos coma Desmadre a la americana, Spider-Man, Serenity, Starship Troopers, El Gran Lebowsky, Dark City, Star Trek, Sweeney Todd ou Austin Powers, polo que parecen ter atinado bastante cos gustos dos seus usuarios potenciais.

Vudu incorporou unha canle de vídeo adulto para ampliar o seu público potencial

As películas con este atractivo prezo corresponden ás versións de definición estándar, pero o atractivo desta oferta podería levar aos competidores a facer as súas propias promocións, e agardemos que esta posible tendencia se espalle internacionalmente, para que a compra de películas en descarga poida ser unha alternativa factible aos videoclubs e incluso ás descargas a través de redes P2P (xa que estas solucións ofrecen seguridade e inmediatez, o que pode compensar o seu prezo).
Dende Vudu tamén quixeron potenciar o seu servizo incorporando a canle AVN, con películas pornográficas entre as que se atopan as últimas novidades en alta definición, que se poderán alugar por 6,99 dólares en calidade estándar e 8,99 dólares en alta definición (podéndose mercar tamén por 19,99 e 29,99 dólares respectivamente).
Para evitar suspicacias, o servizo de vídeo adulto conta cun robusto sistema de control paterno (de xeito que se ocultan os contidos explícitos se non activamos o servizo mediante o correspondente contrasinal).