O videoxogo galego sobre as revoltas Irmandiñas colle impulso en Verkami
martes, 23 de xullo do 2019
O
colectivo de micromecenado en Verkami está a facer comunidade
arredor dun máis que interesante proxecto galego de videoxogo,
mobilizando a busca de apoios de investimento. Trátase
de Outrora, videoxogo galego para PC baseado nas revoltas
Irmandiñas, o levantamento social acontecido na nosa terra no
século XV, en palabras dos creadores de Outrora, “a máis
importante revolta da época en Europa”. A iniciativa, que vén da
man de Zelta Studios, será
un xogo de estratexia para todos os públicos, e prevese que abrolle
ao mercado en xaneiro de 2020.
Este
é o argumento: tralas revoltas e a guerra do século XV, algúns dos
irmandiños superviventes conseguen fuxir a un refuxio no monte, ao
que, co paso do tempo, seguen achegar máis fuxitivos e rebeldes. Co
paso do tempo este asentamento irá medrando até se converter nunha
vila cun exército listo para atacar de novo. Esta vila chámase
Outrora.
O
xogo, ideado por Iván Zelta, consiste no seguinte reto: teremos que
ceibar ás cidades da tiranía da nobreza loitando contra os seus
exércitos, comerciando con recursos e investigando novas tecnoloxías
para mellorar as nosas tropas e edificios. Se conseguimos derrocar a
outras monarquías poderemos tomar o control dos territorios e
ampliar o noso imperio.
O
xogo inclúe xa unha campaña con 16 cidades, oito tipos de recursos
e oito tipos de tropas.
Os
obxectivos, para dar forma debida a Outrora, pasan por
conseguir 2.000 euros de micro-financiamento. En Verkami xa conta con
máis de 20 mecenas. Para máis información cómpre visitar a páxina
web de Zelta Studios.