O xogo do Señor dos Aneis triunfa en Europa e EE.UU.

Os xogos multiusuario en rede son unha das principais revolucións do lecer electrónico grazas en boa medida polo espallamento da banda larga, sendo o referente por excelencia o World of Warcraft, que podería ter xa un digno competidor, posto que El Señor de los Anillos Online está a acadar moito éxito entre a crítica e o público, sendo neste momento o xogo máis vendido para PC en EE.UU., Alemaña, Reino Unido e Francia.
O videoxogo ambiéntase no mundo creado por J. R. R. Tolkien, e pese a que outros xogos baseados nas novelas e películas do Señor dos Aneis non triunfaron, agora podería ter atopado a fórmula do éxito, posiblemente pola súa potencialidade para crear historias, xa que deixa que os xogadores se movan libremente por toda a Terra Media, mundo que se vai enriquecendo coa publicación de expansións e actualizacións.
Os seguidores dos libros e películas nesta saga estarán agora contentos por ter un produto con moito futuro (lembremos que os xogos en liña deste tipo se caracterizan pola súa longa explotación) que lles permitirá recrear mil e unha aventuras.