ONRUSH estréase en Xbox One e PS4

O novo xogo de carreiras arcade de Codemasters, ONRUSH, xa está aquí, con versións para PlayStation 4 e Xbox One, reinterpretando o seu xénero ao procurar o xogo en equipo e eliminando elementos básicos da velocidade como as liñas de saída e chegada, centrándose en novos modos deseñados para acentuar a diversión, a creatividade e a descarga de adrenalina.
Os xogadores terán que colaborar cos seus compañeiros, utilizando as distintas clases de vehículos con cadansúas fortalezas e habilidades para causar estragos e conseguir a vitoria para o equipo.
ONRUSH busca ser accesible e cun alto nivel de xogabilidade, e con sistemas como a Escorrentada, que asegura que os xogadores se manteñan sempre na loita devolvéndoos ao centro da acción de afastarse do resto.
O xogo conta con 8 clases de vehículos (que tamén poden personalizarse), catro innovadores modos de xogo (Overdrive, Switch, Lockdown e Countdown), doce localizacións con múltiples pistas e unha grande profundidade de xogo tanto para un xogador como no multixogador.
Resta agora comprobar se este xogo consegue convencer aos fanáticos das carreiras frenéticas que se afastan da simulación automobilística.