Once compañías socias do Clúster TIC, homologadas para ofrecer ciberseguridade a pemes galegas

Once compañías socias do Clúster TIC Galicia conseguiron a homologación necesaria para poder ofrecer servizos de ciberseguridade a pemes galegas, no marco do programa Empresa Cibersegura 2025 do IGAPE.
Aaccentia, Aldaba, Altia, Emetel, Enxenio, Forensic & Security, Inetum, Infonet, Tarlogic, Itelsis e NTT Data forman parte dos 18 provedores homologados pola Xunta para reforzar a protección das empresas galegas mediante medidas que salvagardan os seus activos críticos, reducen a exposición a ciberataques e permiten previr, detectar, responder de forma áxil e recuperarse ante posibles ameazas na contorna dixital.
As pemes interesadas en acceder ao programa Empresa Cibersegura 2025 deben formalizar a súa solicitude antes do 10 de decembro ás 14.00 h, a través da sede da Xunta, presentando tres ofertas de provedores homologados, así como un acordo con algunha destas entidades, entre outros requisitos.
O Clúster TIC explica que “de resultar beneficiarias destas axudas, poderán recibir os servizos especializados en materia de ciberseguridade cunha cobertura do 75% do custo do orzamento, ata un máximo de 30.000 € por empresa, a condición de que o gasto subvencionable se sitúe entre 18.000 € e 40.000 €”.
No caso de que se supere esta última cifra, a subvención aplicarase unicamente sobre os primeiros 40.000 €, conforme ao límite máximo establecido.
Entre as actuacións a cubrir figuran o diagnóstico de madurez e análise de riscos, servizos de seguridade xestionada de pago, migración segura á nube, protección de contornas industriais (OT), hacking ético, accións de sensibilización e concienciación, implantación de políticas de seguridade conforme ao marco do Esquema Nacional de Seguridade (ENS) ou a Directiva NIS2, así como servizos de acompañamento estratéxico tipo CISO as a Service, entre outros.
“Este programa é unha excelente oportunidade para as pemes, xa que lles permite acceder a servizos de ciberseguridade avanzados, adaptados ao seu tamaño e necesidades a un custo mínimo”, sinala Antonio Rodríguez del Corral, presidente do Clúster TIC de Galicia, quen engade: “E coa garantía e a tranquilidade de estar nas mellores mans, a través de empresas galegas de reputada traxectoria no ámbito da ciberseguridade”.