Opera lanza o seu navegador para a Nintendo Wii

venres, 22 de decembro do 2006 Marcus Fernández

A guerra dos navegadores de Internet nos escritorios informáticos parece quedar só con dous competidores (o Internet Explorer e o Firefox) polo que Opera apunta a súa estratexia empresarial a outros dispositivos, destacando a súa presenza en dispositivos móbiles e con pantallas de dimensións reducidas, aínda que agora tamén se achegará ás consolas de videoxogos domésticas grazas a un acordo con Nintendo que fará que Opera sexa o navegador oficial da nova Wii.
Agora os usuarios da Nintendo Wii que a teñan conectada á Rede poderán descargar de balde unha versión de proba do navegador de Opera para activar así o Canal Internet da Wii e así poder navegar pola web, empregando o revolucionario Wiimando para moverse a través das páxinas de Internet.

JPEG - 57.9 KB
A web oficial da Nintendo Wii vista no seu novo navegador

Este lanzamento podería achegar así os contidos da Internet ós televisores domésticos, algo que non parece acabar de convencer ós usuarios (afeitos a empregar o ordenador para tal fin) polo que sería preciso un certo esforzo por parte dos desenvolvedores para adaptar as páxinas web para a súa correcta visualización en pantallas de pouca resolución (a definición dos televisores é moi inferior á dos monitores de ordenador).
Precisamente son as limitacións dos televisores os que fan que a versión do Opera para Wii sexa diferente á de PC, pois inclúe prestacións coma o zoom intelixente, o modo de columna simple ou o teclado en pantalla.
A versión definitiva do Opera para Wii estímase que sairá a finais de marzo de 2007, aínda que se poderá seguir a empregar de balde ata xuño de 2007, data a partires da cal haberá que pagar 500 puntos Wii para continuar a empregar o navegador.

PUBLICIDADE