Os 25 personaxes máis influentes de Internet, segundo os lectores de Business Week

Cada ano, a revista Business Week, fai unha enquisa entre os seus lectores para que, segundo a súa opinión, escollan aos 25 personaxes máis influentes de Internet.
Nesta ocasión, a listaxe está encabezada polo director executivo de Microsoft, Steve Ballmer, sen o cal a compañía do xubilado Gates non sería o que é a día de hoxe. A este titán dos negocios agárdalle un ano que se podería definir como duro ao ter que levar o negocio da empresa do PC a Internet e restaurar a confianza en Windows dos consumidores que sufriron nas súas carnes o fracaso de Vista e a compra frustrada de Yahoo!. Os seus ingresos mensuais de 1.800 millóns de dólares compensan de xeito máis que suficiente os esforzos que fai por manter á compañía ao pé do canón.
Malia que o seu nome non é moi coñecido, Mitchell Baker, a muller que está á fronte da Fundación Mozilla, conseguiu quitarlle a Internet Explorer un 20 por cento da súa cota de mercado de navegadores en menos de cinco anos, algo que semellaba “misión imposible” ata para o mesmísimo Bond. Business Week asegura que a súa principal ameaza é agora Google Chrome e os navegadores móbiles, “o seu principal desafío”.
Jeff Bezos, é un personaxe que, 14 anos despois de crear Amazon, a compañía que lidera o comercio electrónico mundial, acadou o pasado ano o seu máximo valor en Bolsa. Ocupa o terceiro posto na listaxe e asegura que seguirá “diversificando e incrementado as súas fontes de ingresos”.
Nunha listaxe que recolle as 25 persoas máis influentes da Rede non podían faltar (como era de agardar) os creadores do xigante Google. Sergey Brin, Larry Page e Eric Schmidt ocupan o cuarto posto en influencia pero de seguro que o primeiro en ter aos seus empregados contentos pois son coñecidas as infraestruturas das que dispoñen no seu entorno de traballo e as envexables condicións nas que se inspiran os 18.000 empregados desta gran compañía.
O quinto posto correspóndelle este ano a Jeff Clavier, un investidor pouco coñecido que está considerado un dos máis espelidos detrás da Web 2.0. Din na revista Business que “o seu bo ollo para as start-ups veñen de levalo a investir no agregador NetVibes, o servizo de finanzas persoais Mint ou a rede de publicidade SocialMedia”. Cinco dos proxectos que financiou este “crack” de Internet foron comprados por empresas como Yahoo! e AOL.
A listaxe complétase con outros coñecidos como:

• Paul Graham, investidor.
• Arianna Huffington, editora do blog colectivo The Huffington Post.
• Joi Ito, blogger e ideólogo da Web 2.0.
• Steve Jobs, CEO de Apple.
• Jonathan Kaplan, creador de Flip Video.
• Loic Le Meur, inversor e comunicador.
• Jack Ma, fundador de Alibaba Gorup, líder do comercio electrónico en China.
• Matt Mullenweg, creador de WordPress.
• Rupert Murdoch, magnate de las telecomunicacións e dono de News Corp.
• Craig Newmark, fundador de Craiglist.com.
• Gabe Rivera, creador de Techmeme.
• Kevin Rose, creador de Digg.com.
• Sheryl Sandberg, a muller á fronte de Facebook.
• Jon Stewart, xornalista e comunicador.
• Meter Thiel, inversor.
• Maria Thomas, creadora de Etsy.com.
• Anssi Vanjoki, vicepresidente de Nokia.
• Jimmy Wales, fundador da Wikipedia.
• Evan Williams, creador de Blogger.com.
• Jerry Yang, co-fundador e CEO de Yahoo!