Os Gatos Samurai terán un novo videoxogo en 2026

A primeiros dos anos 90 puidemos ver en televisión a serie de animación xaponesa Los Gatos Samurai, que no seu momento contou cun videoxogo para NES que non chegou a verse fóra do Xapón, pero o editor Red Dunes Games e o desenvolvedor holandés Blast Zero veñen de sorprneder ao anunciar o xogo de rol de acción en 2D Samurai Pizza Cats: Blast from de Past!, que estaría xa en desenvolvemento para as principais plataformas (PC, PS4, PS5, Nintendo Switch, Xbox One e Xbox Series X|S) e xa contaría con ficha en Steam.
O novo xogo do Gatos Samurai ten previsto comercializarse globalmente en 2026, e pretende ser respectuoso coa serie de animación de culto, de xeito que conservará a súa estética e recuperará a moitos dos seus actores de dobraxe en xaponés e inglés.
Polo momento o que coñecemos do xogo é o seu aspecto gráfico a través do seu primeiro tráiler, así como o feito de que durante as partidas os xogadores poderán alternar entre os distintos Gatos Samurai, para utilizar as súas habilidades específicas para resolver os quebracabezas e unirse a combates desafiantes.