Os adictos ao cibersexo son máis proclives a sufrir depresións e desacougo

Segundo un estudo publicado pola Universidade de Swinburne, en Australia, o consumo excesivo de pornografía en Internet “pode conducir á depresión e provocar desequilibrios psíquicos e emocionais nos internautas”.
O estudo, que foi realizado entre 1.325 homes australianos e estadounidenses, engade que as persoas que frecuentan sitios web de pornografía ou sexo a miúdo, “teñen niveis elevados de depresión, ansiedade e estrés, ata o punto de ser alarmantes”.
Entre os voluntarios que participaron na investigación de campo, “marcouse” como adictos aos que dedican máis de doce horas por día a chatear en Internet sobre sexo, enviar imaxes pornográficas, ver ou descargar vídeos ou empreñar webcams para tal fin.
De acordo cos analistas, os que dedican máis tempo a estas actividades (aparte de durmir pouco e traballar menos) “corren o perigo de sufrir un trastorno mental”, e perden toda posibilidade de manter algún tipo de relación social alén da Rede.
O perfil dos homes estudados abarca individuos de entre 18 e 80 anos, dos cales, segundo conclúe o estudo, “o 27 por cento ten cadros de depresión moderada a severa, un 30 por cento presenta niveis altos de ansiedade e un 35 por cento sufre estrés”.