Os cociñeiros de Paradores achegan as súas mellores receitas nunha nova web

Segundo recolle a Wikipedia, a rede de Paradores Nacionais de Turismo, constitúe unha empresa estatal que busca aproveitar os numerosos monumentos históricos e artísticos, así como os paraxes de gran beleza que posúe España, “para situar uns establecementos que permitan coñecer a variada riqueza cultural, artística, histórica e paisaxística do noso país”.
O que non nos achega esta gran enciclopedia de contido libre na Rede é que nos Paradores, a tradición nunca estivo disputada coas novas tecnoloxías, e agora máis que nunca así o veñen de demostrar, ao lanzar unha nova web de dominio .tv, onde priman os contidos audiovisuais.
En concreto, esta nova web ten por obxectivo recoller as receitas favoritas dos chefs dos 93 Paradores que hai habilitados actualmente en España, para poñelas ao servizo de todo aquel que queira seguilas por Internet e intentar realizala na súa casa para sorprender aos seus convidados (correndo o risco de estragar a cita).
A iniciativa consiste basicamente en que cada cociñeiro protagoniza un vídeo de pouco máis de dous minutos de duración nos que ofrece un dos seus platos tradicionais elaborado dacordo coa rexión na que se ubica o establecemento que representa.
As primeiras 20 video-receitas inclúen platos como os lombos de cervo de Guadalupe, o arroz con lebre do Parador de Soria, os fabóns á sanabresa de Zamora, as patacas á rioxana de Calahorra, a paletilla de cordeiro ao estilo Miróbriga de Ciudad Rodrigo, a menestra á rioxana do Parador Bernardo de Fresneda ou un plato tan típico como a paella valenciana.
Polo de agora haberá que agardar a que as cámaras de Parador.tv cheguen a Galicia para saber con qué prato nos sorprenderán os chefs de cada un dos nosos establecementos pero seguramente non defraudarán ao internauta.