Os creadores de videoxogos ven de distintos xeitos a actual guerra de consolas
martes, 21 de agosto do 2007
O vindeiro xoves comeza en Leipzig a feira europea
do videoxogo máis importante, a Games
Convention, que para quecer motores conta como preludio cunha conferencia para desenvolvedores, nas
que os creadores de videoxogos se xuntan para compartir experiencias.
Na presente edición parece que hai un tema que preocupa á Industria, que é a
guerra das consolas de nova xeración, aparecendo opinións discrepantes, e así,
mentres Don
Daglow, presidente de Stormfront Studios, defende que a Nintendo Wii debe
considerarse dentro desta familia mentres que outros prefiren desbotar a
esta consola fronte ás de alta definición (a Xbox 360 e a PS3) pese a que a de
Nintendo está a ter unha mellor acollida por parte do público. Daglow considera
que a Wii é de nova xeración porque
abre “unha nova perspectiva” para o
xogador despois de botar unha partida, e compara a innovación desta consola
coas revolucións que achegaron xogos coma Sim
City, Guitar Hero ou World of Warcraft.
Pero resulta moito máis radical a postura de Denis Dyack, o presidente de
Silicon Knights, que se amosou moi contrario á actual guerra de consolas, de
xeito que, como non hai ningunha vencedora, se están a repartir o mercado dun
xeito moi semellante, o que fai moi complicado para os desenvolvedores a creación
de xogos que sexan auténticos grandes éxitos. Dyack asegura que a Industria vai
moito mellor cando hai unha consola dominante, e que a guerra debe estar nos
xogos e non nas consolas, chegando a asegurar que nunha vindeira xeración
desaparecerán as marcas de hardware e existirá
unha plataforma unificada.
O conflito actual é unha especie de guerra
santa para os partidarios de certas plataformas que só pretenden xustificar
os cartos que gastaron na súa consola, mentres que a simplificación do mercado
podería crear xogos mellores e máis baratos (xa que desenvolver para varias
plataformas resulta excesivamente custoso e complicado).