Os partidos de fútbol poderían televisarse coa intervención dun único técnico

Estes días celebrouse o Foro Económico do FesTVal en Vitoria-Gasteiz, onde Tatxo Benet de Mediapro realizou un anuncio bastante prometedor no que se refire ao futuro audiovisual das retransmisións deportivas: “desenvolvimos un equipo autosuficiente para gravar partidos e só é preciso un técnico”. Non entrou en detalles, pero pensar que será posible equipar os estadios de fútbol coa tecnoloxía suficiente como para que un único profesional sirva para operar unha retransmisión televisiva dun encontro deportivo pode supor un grande cambio de cara á popularización das retransmisións ao reducir considerablemente o seu custo.
Benet tamén realizou interesantes reflexións sobre os dereitos deportivos, que nos últimos anos viviron duras loitas pola súa contratación, destacando que este ano foi a primeira vez en moito tempo na que non houbo guerra polo fútbol, o que consideran que foi posible grazas á entrada en vigor do sistema de venda centralizada de La Liga.
Aínda que as compañías están a facer importantes desembolsos económicos polos dereitos deportivos, o socio de Mediapro atreveuse a asegurar que non existe burbulla no fútbol, senón que simplemente hai moita demanda (o que dispara o prezo).