Os subscritores de PS Plus recibirán en outubro xogos de recheo

Semella que pasado o verán, e quedando aínda bastante para o Nadal, as compañías de videoxogos relaxan a súa oferta de xogos para os usuarios subscritos aos seus plans de pagamento para xogar en liña, e ao igual que os Xogos con Gold de Xbox para outubro son bastante decepcionantes, os que recibirán os subscritores de PlayStation Plus van polo mesmo camiño.
A partires do 2 de outubro estarán dispoñibles para PlayStation 4 Friday the 13th: The Game, ou sexa, a adaptación ao videoxogo da saga de filmes de Venres 13, que pode resultar curioso, pero tamén pode considerarse todo un fracaso comercial; e tamén Laser League, un xogo do estudio detrás de OlliOlli (505 Games) que permitirá botar partidas de 2 contra 2 ou 3 contra 3, e que ata o momento podía considerarse como todo un descoñecido para o grande público.
Se mirarmos os xogos para PlayStation 3 tamén atopamos puro recheo, como serían Master Reboot e The Bridge (destacando este último por ser compatible tamén con PS4 e PS Vita); e o mesmo acontecería con PS Vita, para a que chegan os xogos Rocketbirds 2: Evolution e 2064: Read Only Memories (ambos compatibles tamén con PS4).
En definitiva, que outubro será un mes de trámite para os subscritores de PlayStation Plus, que claramente non estarán satisfeitos con estes títulos, especialmente porque o servizo subiu recentemente de prezo, polo que non parece xusto que a oferta de xogos sexa tan pobre.