Os subscritores de pagamento de Xbox LIVE poderán gozar de 3 xogos de balde esta fin de semana

ata o remate da fin de semana os usuarios Gold de Xbox LIVE teñen a oportunidade de xogar de balde a tres xogos, For Honor, XCOM 2 e Just Cause 3¸ que pese a non seren novidades conservan bastante frescura e, no caso de resultar satisfactoria a experiencia, durante estes días están de oferta con descontos significativos, sendo posible mercar Just Cause3 por só 6 euros, XCOM 2 por a partires de 16,50 euros e For Honor por dende 17,50 euros. As versións máis completas dos citados xogos teñen descontos equivalentes.
Just Cause 3 é un xogo moi dinámico e espectacular, no que tomamos o rol de Rico Rodríguez, un heroe de acción que terá que loitar para liberar unha illa do Mediterráneo do xeneral Di Ravello, nunha aventura chea de destrución, armas de fogo e vehículos moi variados, dende os que experimentar secuencias moi cinematográficas.
XCOM 2 é un xogo de estratexia por quendas de corte máis clásico, no que hai que confrontar a unha invasión alieníxena para garantir o futuro da humanidade. Trátase dunha revisión dunha saga clásica, que coa súa renovación demostrou que a súa fórmula segue moi vixente, como poderá comprobarse de balde ata as 9 da mañá do luns.
For Honor, pola súa banda, é unha proposta máis arriscada, na que podemos comprobar o desenvolvemento de combates entre guerreiros templarios, samurais e viquingos, con mecánicas nas que buscan reflectir a violencia dos enfrontamentos e que estes días permite que comprobemos as moitas novidades que recibiu dende o seu lanzamento.