Os supermercados precisan mellorar en atención telefónica e online
mércores, 18 de xullo do 2018
Os
supermercados con presenza na nosa terra están lonxe do estándar de
atención ao cliente que ofrece o líder do comercio electrónico.
Así nolo veñen de confirmar a Unión de Consumidores de Galicia
(UCGAL) e ADECES (Asociación prol Dereitos Civís, Económicos e
Sociais), tras
elaborar de maneira conxunta o primeiro Estudo sobre a Atención
ao Cliente en Supermercados: comprando mellor atención, que
avalía as canles de atención dos grandes grupos de distribución
(Alcampo, Carrefour, Dia, Eroski, Hipercor, Lidl e Mercadona),
poñendo o foco na atención telefónica e nas canles electrónicas,
incluídas as redes sociais. Segundo se fai saber na investigación,
hai máis sombras ca luces en materia de atención dixital.
Nun
plano máis detallado, ambas as asociacións consideran que a
atención telefónica presenta problemas nalgúns casos: chamadas
erradas de máis e longos tempos medios de espera (até 207 segundos
e chegando nalgúns casos a tempos de 17 minutos). Polo que se refire
ás canles dixitais, resolven só o 71% de media das consultas
formuladas, con extremos que van desde o 20% até o 87%. Ademais, o
tempo medo de resposta que se rexistra nas consultas electrónicas
vai alén das 45 horas.
Pola
contra, o estudo sinala que o SAC telefónico “ten bo nivel na
solución dos problemas”, e a atención e cooperación “acadan
unha nota aceptábel”.
En
materia de protección de datos, a investigación apunta a que “é
necesario mellorar algúns aspectos, de acordo co novo regulamento”.
Por exemplo: cómpre informar sobre a posibilidade que teñen os
usuarios de reclamar ante a Axencia de Protección de Datos, indicar
con claridade o lugar onde se atopan os servidores que almacenan a
información ou determinar con maior exactitude o tempo de
conservación dos mesmos.
Polo
que se refire ás linguas co-oficiais, o estudo convida aos grupos a
traballar a normalización das mesmas, e máis tendo en conta que boa
parte da súa cliente é falante destas linguas. UCGAL denuncia, ao
fío do devandito, que hai tres grupos que só teñen o castelán na
súa páxina web.
Ademais,
ADECES e UCGAL suxiren a Lidl que introduza o servizo de compra en
liña e a Mercadona que facilite nos seus centros a recollida no
aparcadoiro.