Os tribunais continúan a dar luz verde a Prisacom para adquirir Meristation

O pasado novembro sabiamos dunha resolución xudicial que autorizaba a Prisacom a adquirir a web de videoxogos Meristation en virtude dun contrato de 2002 que permitiría a PRISA mercar o medio electrónico por 600.000 euros, prezo co que non están conformes os seus fundadores, polo que recorreron a sentenza e agora sabemos que a apelación volve a darlle a razón ao Grupo PRISA, de xeito que poderá incluír aos seus medios esta web que actualmente conta con máis de 5.000 análises de videoxogos e que é un dos medios de referencia do sector.
A sentenza non só pide respectar o acordo inicial, senón que tamén insta a Meristation Magazine a indemnizar a Prisacom por danos e prexuízos, aínda que o litixio aínda non rematou, pois a sentenza non é firme.
Parece inevitable que Meristation remate sendo un medio do Grupo PRISA, polo que unha vez que remate toda esta operación haberá que ver se a publicación mantén a súa posición na Rede, pois outros medios españois de éxito perderon pulo ao deixar a súa dirección os seus promotores iniciais.