Os videoxogos volven protagonizar unha nova edición da Hobbycon

venres, 26 de xullo do 2019 Marcus Fernández

As instalacións de PALEXCO acollen un ano máis a feira multidisciplinar Hobbycon, que está a xuntar a seareiros de distintas disciplinas nos lecer alternativo como serían a banda deseñada, o manga, os xogos de mesa, o K-pop, a cultura asiática e os videoxogos.
Precisamente o mundo dos videoxogos ten unha presenza que poderiamos considerar transversal, xa que, aparte de postos de xogo libre no recinto e a celebración de numerosos torneos, a cultura do gaming invade outros ámbitos, de xeito que a meirande parte dos cosplays que poden verse até o domingo en PALEXCO están inspirados en videoxogos como League of Legends ou Nier: Automata.
Tamén están presentes os creadores independentes de videoxogos KST Studios co seu xogo Sea Bubble, e na sección de artesanía podemos atopar á xente de Identik3D comercializando pezas impresas en 3D inspiradas en videoxogos como Pokémon ou StarCraft.
Na fin de semana celebraranse diferentes competicións de videoxogos e tamén cómpre advertir de que o domingo os cosplayers poderán acceder ao recinto de balde.

JPEG - 84.8 KB
KST Studios permite xogar ao seu Sea Bubble no recinto de PALEXCO
JPEG - 145.8 KB
Identik3D leva a Hobbycon diferentes impresións 3D inspiradas en videoxogos

PUBLICIDADE