Os zombis invaden a Nintendo Wii

Este venres chega ás tendas Resident Evil: The Umbrella Chronicles, que é a primeira entrega desta saga para a Nintendo Wii, polo que sorprende que este tipo de xogo tan terrorífico desembarque nunha consola habitualmente asociada cun público infantil ou con xogadores ocasionais.
Os xogos de Resident Evil (que mesmo inspiraron 3 películas) sumen ó usuario nun ambiente sombrío, no que hai que enfrontarse ás consecuencias da liberación dun virus desenvolvido pola Corporación Umbrella que converte á xente en zombis, aínda que tamén aparecen outros monstros creados por enxeñería xenética.
Este título para Wii presenta unha perspectiva subxectiva, e o xogador pode empregar o mando da Wii para apuntar e disparar ás ameazas que van aparecendo na pantalla (podéndose empregar o accesorio Wii Zapper para dar máis realismo á experiencia), tendo que axitar o mando para recargar a arma. En certos momentos tamén hai que pulsar un botón en particular o efectuar un movemento determinado para esquivar un perigo (Quick Time Events) polo que os reflexos do xogador serán os que o salven de rematar infectado polo virus T.
A trama do xogo desenvolverase en 4 localizacións: o descarrilamento do tren, o incidente da mansión, a destrución de Raccoon City e a fin de Umbrella. Cada capítulo contará con 3 niveis nos que podemos elixir entre 2 personaxes a controlar (cada un con distintas capacidades físicas) e mesmo existen algúns niveis desbloqueables.
Quedará por ver se os usuarios da Wii acollen positivamente un xogo que nun principio parece máis propio do PC ou das consolas de videoxogo de Sony ou Microsoft.