PS Plus inclúe Titanfall 2 entre os seus xogos de decembro

Os subscritores de PlayStation Plus recibirán no mes de decembro entre a súa selección de xogos un título tan relevante como Titanfall 2, creación de Respawn Entertainment que ofrece tanto unha innovadora campaña para un xogador como un frenético multixogador no que combater no terreo como humanos ou pilotando enormes titáns mecánicos.
Este intenso shooter en primeira persoa non chega só, senón que está acompañado polo xogo oficial de Monster Energy Supercross, título que convida a participar en carreiras de supercross percorrendo pistas oficiais ou incluso pistas creadas polos usuarios (que poden compartirse en liña).
Como guinda, tamén inclúen o xogo de PS Talets eCrossminton, simulador do xogo de raqueta emerxente coñecido como crossminton, no que os xogadores están situados en dous campos separados sen rede, empregando un volante e raquetas especiais. Pode xogarse tanto en partidos individuais como dobres.