Paramount Skydance pecha o acordo de compra de Warner Bros. Discovery

Paramount Skydance Corporation e Warner Bros. Discovery (WBD) anunciaron a sinatura dun acordo definitivo de fusión polo que Paramount adquirirá o 100 % das accións de WBD a un prezo de 31 dólares por título en efectivo. A operación, que conta coa aprobación unánime dos consellos de administración de ambas compañías, valora Warner Bros. Discovery en 81.000 millóns de dólares en capital e 110.000 millóns de dólares en valor empresarial.
O peche está previsto para o terceiro trimestre de 2026, condicionado ás autorizacións reguladoras pertinentes e ao visto e prace dos accionistas de WBD, cuxa votación se agarda para a primavera. No caso de que a transacción non se complete antes do 30 de setembro de 2026, os accionistas de WBD recibirán unha compensación adicional de 0,25 dólares por acción e trimestre ata o peche efectivo.
A nova compañía resultante aspira a converterse nun actor global de referencia nun sector en transformación acelerada, combinando capacidades tecnolóxicas avanzadas cun amplo catálogo de propiedade intelectual. Entre as franquías que pasarán a integrarse baixo o mesmo paraugas figuran Game of Thrones, Harry Potter, Misión Imposible, Top Gun, o Universo DC, The Lord of the Rings, Star Trek, Transformers e Bob Esponja, entre outras. O grupo resultante contará cun catálogo cinematográfico superior aos 15.000 títulos e miles de horas de contido televisivo.
A integración reforzará as plataformas de distribución directa ao consumidor (DTC), coa combinación de Paramount+, HBO Max e Pluto, configurando un competidor global no mercado do streaming. A compañía comprométese a producir un mínimo de 30 estreas cinematográficas anuais (15 por estudio), garantindo para cada filme unha estrea completa en salas cunha xanela mínima global de 45 días antes da súa dispoñibilidade en vídeo baixo demanda de pago, coa intención de estender ese período ata entre 60 e 90 días nas producións de máis éxito. Posteriormente, manterase o réxime habitual de explotación en formato doméstico antes da súa chegada ás plataformas por subscrición. A empresa tamén manterá os compromisos específicos de xanelas de estrea en territorios como Francia.
No ámbito financeiro, Paramount emitirá 47.000 millóns de dólares en novas accións de clase B a un prezo de 16,02 dólares por acción, cun investimento totalmente comprometido pola familia Ellison e RedBird Capital Partners. Ademais, a operación contará con compromisos de débeda por importe de 54.000 millóns de dólares subscritos por entidades financeiras internacionais, incluíndo 15.000 millóns destinados a respaldar financiamento ponte existente e 39.000 millóns en nova débeda incremental. Os actuais accionistas de Paramount poderán participar nunha ampliación de capital adicional de ata 3.250 millóns de dólares.
Paramount estima sinerxías superiores aos 6.000 millóns de dólares, derivadas principalmente da integración tecnolóxica (incluíndo a unificación dos sistemas de planificación de recursos empresariais e das infraestruturas de streaming), a optimización inmobiliaria e a racionalización de custos corporativos. Unha vez aplicadas as sinerxías previstas, a valoración de WBD sitúase en 7,5 veces o EBITDA estimado para 2026. Ao peche, a compañía combinada prevé unha ratio de débeda neta sobre EBITDA de 4,3 veces, cunha folla de ruta para acadar métricas de cualificación crediticia de grao de investimento nun prazo de tres anos.
A nova estrutura reforzará tamén o seu posicionamento no ámbito deportivo, cun amplo portfolio de dereitos que inclúe a NFL, os Xogos Olímpicos, UFC, PGA Tour, NHL, competicións universitarias estadounidenses e a Liga de Campións, permitindo unha distribución integrada en todas as plataformas do grupo.
Con presenza en máis de 200 países e territorios, a compañía resultante aspira a fortalecer a súa infraestrutura tecnolóxica, mellorar a experiencia de usuario e consolidar unha posición competitiva sostible nun mercado cada vez máis concentrado e esixente.