Pechan Yend It, unha das webs que difundía series de televisión e películas baseándose no servizo Stage6

Os responsables de DivX crearon en marzo de 2006 un reprodutor do seu formato de vídeo orientado á web que se completaría 5 meses despois co servizo Stage6 quixeron crear un YouTube de seu, con contidos de altísima calidade (mesmo teñen clips en alta definición) que comezou con certa permisividade, polo que multitude de usuarios se dedicaron a compartir mediante tal plataforma unha chea de películas e series de televisión librándose así das complicacións das redes P2P.
En vista de que publicar contidos sen permiso podería dar problemas a Stage6, a xente de DivX eliminaba da súa web as referencias ós vídeos conflitivos, pero non os borraba do seu sistema, o que propiciou a aparición de webs coma Joox, que recompila centos de vídeos en inglés de material difundido sen permiso dos seus autores.
Vendo que dende DivX non tomaban medidas ante este tipo de webs (posiblemente para promover o engadido para o navegador que permite a visualización de clips en DivX incrustado en páxinas web) apareceron moitas réplicas de Joox para contidos en español, destacando Películasonline, Yend It, Sinlamula e Divoox, pero tras moitos meses de bo funcionamento parece que dende DivX non queren arriscarse a que a proliferación deste tipo de webs lle afecte negativamente, e comezan a vetar o acceso ós contidos do seu servidor dende algúns dominios de Internet. Tal pasou con Yend It, páxina que vén de pechar tras recibir unha advertencia de DivX e á que poderían seguir o resto.
Nun blog, o responsable de Yend It baixo o pseudónimo FeKuLa comentaba o acontecido, recomendando ós seguidores da súa web que empregasen servizos alternativos e recoñecendo que prefería non complicarse a vida loitando contra os vetos da compañía norteamericana.
De continuar a persecución de webs deste tipo por parte de DivX pasarían a estar en perigo de extinción, e os seus usuarios deixarían de ter unha biblioteca videográfica de balde na Rede, que podería estar a supor un importante prexuízo a industria audiovisual (xa que permite a descarga de contidos protexidos por dereitos de autor a unha enorme masa de usuarios que non se atreve coas tecnoloxías P2P).