Periga o futuro de Bloglines polo seu mal funcionamento actual

Dende TechCrunch denuncian o mal funcionamento de Bloglines na actualidade

Nas empresas tecnolóxicas é normal un crecemento meteórico que leva á venda da compañía por un prezo elevado, pero tampouco é raro que os novos propietarios dun servizo moi popular na Rede descoñezan cómo manter o éxito, e iso parece estar a pasar con Bloglines, a plataforma de lectura de fluxos RSS que ata hai poucos meses era líder na Internet (aínda que foi perdendo posicións ante o sistema homólogo de Google) e que agora podería estar a nun momento crítico, e mesmo o fundador da compañía, Mark Fletcher (quen a vendeu en 2005 a Ask.com) criticou que Bloglines non está a actualizar a información de milleiros de blogs, o que fai que o servizo perda toda a súa utilidade, facendo que os usuarios se vexan forzados a migrar a Google Reader.

O fundador de Bloglines quéixase do mal funcionamento do servizo dende Twitter

Curiosamente a operación de mudarse de Bloglines a Google Reader ou mesmo a un lector de RSS de escritorio é moi doada (pois conta con opción de exportar as nosas subscricións), polo que poderiamos estar a vivir o ocaso dun servizo que fora o número 1 e que por desidia dos seus actuais responsables podería quedar no esquecemento.