PlayStation Plus incluirá The Last of Us Remasterizado en outubro

martes, 24 de setembro do 2019 Marcus Fernández

Aproveitando a emisión dun novo State of Play, Sony anunciou que os xogos que incluirá PlayStation Plus no mes de outubro serán dous títulos dos seus Worldwide Studios: o xa clásico The Last of Us Remasterizado e MLB The Show 19.
A incorporación da versión para PlayStation 4 de The Last of Us (posiblemente o mellor xogo de PlayStation 3) chega nun momento no que resulta clara a intención de Sony: facer que os poucos que aínda non gozaron deste título o coñezan para así animarse logo a facerse coa súa secuela, prevista para o ano que vén.
Este título de Naughty Dog ambiéntase nun futuro próximo, tras un brote infeccioso que fixo desaparecer a civilización tal e como a coñecemos, deixando as ruínas para uns poucos sobreviventes que terán que enfrontarse tanto a outras persoas (principalmente pola falta de recursos) como aos perigosos infectados que poden xurdir de calquera recuncho.
Por outra banda, MLB The Show 19 podería considerarse un grande descoñecido en Europa, xa que é un xogo de béisbol, que pese a pertencer a unha franquía consolidada, probablemente continuará a verse ignorado por un público que non coñece o deporte a fondo o deporte ao que quere dar vida.

PUBLICIDADE