Playground ofrecerá no Interplay un obradoiro de vídeo para redes sociais
mércores, 7 de marzo do 2018
O
quinto festival de contidos dixitais Carballo Interplay vén de abrir
a preinscrición para o seu obradoiro Narrativas de vídeo en
redes sociais. Contidos complexos vs. audiencias masivas, que
terá lugar o venres 6 de abril no Pazo da Cultura de Carballo. As
persoas interesadas en participar nesta actividade impartida por
Josune Imízcoz e Guillermo Carreras-Candi, responsábeis de vídeo
da plataforma PlayGround,
poden reservar a súa praza na web do festival
(carballointerplay.com)
até o 19 de marzo. Segundo informa a organización do certame
(Interplay Producións e o Concello de Carballo) hai 25 prazas
dispoñíbeis e o prezo da actividade é de 20 euros.
Para
quen non o saiba, PlayGround xurdiu en 2008 como revista dixital
enfocada á música, aínda que axiña evolucionou cara a medio
tecnolóxico referencial, multitemático, independente e con
importante pegada nas redes sociais. Dende a súa experiencia, os
seus impulsores abordarán no obradoiro de Carballo a disxuntiva
entre un presente que require explicacións cada vez máis complexas
e un contexto mediático que tende a comprimir cada vez máis as
historias e escoller os temas só en función da súa potencial
viralidade.
O método de traballo nas tres horas da actividade
combinará unha parte analítica con outra creativa. Na primeira
parte as persoas inscritas participarán nunha visualización
conxunta de vídeos de PlayGround e outras plataformas, “co
obxectivo de comprender o funcionamento dos contidos complexos no
entorno das redes sociais”. Na segunda parte buscaranse enfoques
para temas propostos polos alumnos e alumnas e desenvolveranse
borradores audiovisuais por parellas que serán finalmente
comentados. A organización recoméndanos carrexar computadora
portátil para poder escribir e editar imaxes se fose
preciso.
Obradoiros gratuítos para crianzas, con Vermislab
O
Carballo Interplay ofrecerá, tamén, dous obradoiros gratuítos para
crianzas da man do proxecto de innovación educativa Vermislab, que
quere potenciar a creatividade de nenos e nenas en eidos como a
ciencia, a tecnoloxía e o deseño. Así, a sexta feira (venres) 6 de
abril, de 16h a 18h, a rapazada de máis de 9 anos aprenderá, no
Pazo da Cultura de Carballo, desde os conceptos básicos da
electricidade até como combinar diferentes compoñentes
electrónicos, facer circuítos usando placas de prototipado e
soldadura para elaborar os seus deseños usando dispositivos
electrónicos e mesmo farán música combinando a electrónica con
obxectos cotiáns. O sábado 7, de 10h a 14h, pais e nais e crianzas
de máis de 6 anos terán ocasión de mergullarse nas diferentes
maneiras de esculcar no mundo microscópico, farán cultivos e
incluso fabricarán o seu propio microscopio electrónico que poderán
carrexar para a casa. As persoas interesadas poden reservar xa a súa
praza, na web do Interplay.