PluggedIn, a nova plataforma norteamericana de vídeos musicais

A nova web achega vídeos musicais de alta calidade

A presenza musical na Rede é moi ampla, pero iso non evita que un novo axente busque un sitio de seu, e PluggedIn quere converterse na plataforma oficial para os vídeos musicais inspirada en Hulu (a plataforma de series de televisión máis importante dos EE.UU.).
PluggedIn amosa vídeos musicais de alta calidade de compañías coma EMI, Sony BMG e Universal, xunto cunha número importante de selos independentes, agardando que Warner Music se sume a esta iniciativa en breve, o que podería atender a unha demanda de vídeos de alta calidade fronte aos contidos que habitualmente se poden atopar en YouTube.
No seu lanzamento este servizo conta cuns 10.000 vídeos, que polo momento só se poden ver dende EE.UU. e Canadá (como tamén pasa con Hulu) aínda que sería desexable que eliminasen as restricións xeográficas para que os afeccionados á música teñan unha plataforma de referencia onde ver os seus vídeos musicais favoritos sen ter que padecer a mala calidade que presentan moitos dos clips que hai na web (e que normalmente están cheos de logotipos e outros grafismos de canles de televisión).